أشارت الصفحة الرسمية لوزارة الأوقاف على منصة التواصل الاجتماعي فيسبوك إلى: التحرش جريمة مش رجولة
ومش لحظة انفعال، ولا هزار..
التحرش جريمة كاملة بتسرق أمان بنت، وبتسيب جرح ما يتنسيش.
كل مرة بنت بتتأذى.. في قلب بيتكسر، وفي خوف بيتزرع جواها، وفي ثقة بتضيع من المجتمع.
واللي يضحك، أو يبرّر، أو يسكت.. شريك في الذنب، وشاهد زور على الكرامة.
التحرش مش نزوة تتنسي، ولا غلطة تعدي..
ده باب لفاحشة، وطريق لانهيار الأخلاق، وسمّ بيفسد المجتمع كله.
ربنا سبحانه وتعالى قال:
{وَلَا تَقْرَبُوا الزِّنَىٰ إِنَّهُ كَانَ فَاحِشَةً وَسَاءَ سَبِيلًا}
والتحرش أول الطريق للهاوية.
وسيدنا النبي ﷺ قال:
«والله لا يؤمن… الذي لا يأمن جاره بوائقه».
طب إزاي يبقى في إيمان عند واحد البنات نفسها مش آمنة منه في الشارع؟!
الرجولة مش في فرض الخوف.. الرجولة في زرع الأمان.
الرجولة مش إنك تستغل ضعف.. الرجولة في إنك تبقى سند وحماية.
ولكل بنت اتعرضت لتحرش:
إنتِ مش مذنبة، الذنب ذنبه هو.
إنتِ أقوى منه، وربنا شايف وسامع، وهيقتص.
اللهم احفظ أولادنا وبناتنا، وطهّر قلوبنا من النفاق، وأعيننا من الخيانة، وألستنا من الكذب، ونفوسنا من الهوان.
#التحرش_جريمة
#صحح_مفاهيمك
#وزارة_الأوقاف_المصرية
Source